कोल्हापूर : मराठी पत्रकार परिषदेशी संलग्न असलेला कोल्हापूर जिल्हा मराठी पत्रकार संघ आणि कोल्हापूर डिस्ट्रिक्ट रिपोर्टर्स वेल्फेअर असोसिएशन यांच्या संयुक्त विद्यमाने शनिवारी, १० जून रोजी पत्रकार संरक्षण कायदा जागृती शिबिराचे आयोजन करण्यात आले आहे. दुपारी दोन वाजता शाहू स्मारक भवन येथे हे शिबिर होणार आहे.
राज्यभरातील सर्व वृत्तपत्रे, साप्ताहिके, वृत्तवाहिन्यांचे प्रतिनिधी, उपसंपादक, छायाचित्रकार, कॅमेरामन यांच्यासाठी महाराष्ट्र शासनाने नुकताच पत्रकार संरक्षण कायदा मंजूर केला आहे. या कायद्यासाठी पत्रकार हल्लाविरोधी कृती समिती गेली काही वर्षे लढा देत होती. मराठी पत्रकार संघाच्या नेतृत्वाखाली पुकारलेल्या लढ्याला यश आले आहे. पत्रकार संरक्षण कायद्याची सविस्तर माहिती देण्यासाठी हे शिबिर आयोजित करण्यात आले आहे. या शिबिरासाठी प्रमुख पाहुणे म्हणून कोल्हापूर जिल्ह्याचे पालकमंत्री चंद्रकांतदादा पाटील उपस्थित राहणार आहेत. ज्यांच्या नेतृत्वाखाली या कायद्यासाठी लढा उभारला गेला, ते मराठी पत्रकार परिषदेचे अध्यक्ष एस. एम. देशमुख आणि विश्वस्त किरण नाईक या कायद्याबाबत मार्गदर्शन करणार आहेत. या शिबिराला ‘मुंबई भाजप’चे अध्यक्ष अॅड. आशिष शेलार, जिल्हाधिकारी अविनाश सुभेदार, विशेष पोलिस महानिरीक्षक विश्वास नांगरे-पाटील, मराठी पत्रकार परिषदेचे विभागीय सचिव समीर देशपांडे यांच्यासह अन्य मान्यवर उपस्थित राहणार आहेत. जिल्ह्यातील सर्व पत्रकार, छायाचित्रकार, उपसंपादक, प्रसारमाध्यमांचे प्रतिनिधी, कॅमेरामन यांनी या शिबिराला उपस्थित राहावे, असे आवाहन पत्रकार संघाचे अध्यक्ष चारुदत्त जोशी व रिपोर्टर्स वेल्फेअर असोसिएशनचे अध्यक्ष सुधाकर निर्मळे यांनी केले आहे.
